पोखरा/ एकीकृत नेकपा माओवादीका अध्यक्ष पुष्पकमल दाहाल प्रचण्डले अबको केही हप्तामा सेना समायोजन निष्कर्षमा पुग्ने दाबी गरेका छन् । अवकास रोजेका लडाकूहरुको बिदाई सकिसकेको भन्दै उनले अब समायोजन प्रक्रिया सुरु हुने बताए ।
१७ औं जनयुद्ध दिवस मनाउने क्रममा गत फागुन १ गते काठमाडौमा दुर्घटनामा परि ज्यान गुमाएका प्रगतिशील लेखक संघका अध्यक्ष घनश्याम ढकालको श्रद्धाञ्जली सभामा प्रचण्डले भने –‘सेना समायोजन प्रक्रियाको पनि हामी अन्त्यमा छौं, अब केही हप्तामा नै निष्कर्ष निस्कन्छ ।’माओवादी अध्यक्ष प्रचण्डले सविधान लेखन प्रक्रिया पनि छिट्टै निष्कर्षमा पुग्ने भन्दै ढुक्क हुन आग्रह गरेका छन् । अब बन्ने सविधान जनभावना अनुसारको हुने भन्दै उनले भने –‘सविधान लेखन प्रक्रिया निष्कर्षमा पुग्ने वातावरण बन्छ ढुक्क हुनुहोस् ।’
प्रचण्डले स्वर्गीय ढकालले लेखेका विभिन्न कृतिहरु प्रकाशन गर्न माओवादी पार्टीले सहयोग गर्ने र पोखराको शहीद स्मृति पार्कमा शहीद सम्बन्धी पुस्तकालय निर्माणको लागि पहल गर्ने आश्वासन दिएका छन् । ढकालका परिवारले शहीद पार्कमा शहिद सम्बन्धी पुस्तकालय बनाउने ढकालको सपना पूरा गर्न र उनीद्वारा लिखित केही कविताहरुलाई पोखरा विश्वविद्यालयको पाठ्यक्रममा समावेश गर्न आग्रह गरेको थियो ।
0 प्रतिकृया:
Post a Comment