दमक । पूर्व पश्चिम राजमार्ग अन्तर्गत झापाको दुधेमा बिहीबार भएको बस दुर्घटना हुदा एक बृद्धाको मृत्यु भएको छ । अपरान्ह ४ः३० वजे भएको दुर्घटनामा झापा जलथल ७ की ८५ वर्षीया बेदमाया ढकालको मृत्यु भएको हो । काकडभिट्टाबाट बिराटनगर जाँदै गरेको को १ ख ३१५९ नम्वरको बस पल्टिदा घाइते भएकी ढकालको बिर्तामोडस्थित बिएमसी हस्पिटलमा उपचारको क्रममा मृत्यु भएको इलाका प्रहरी कार्यालय झिलझिलेका इन्स्पेक्टर बिनोद निरौलाले बताए । २५ जना यात्रुहरु घाइते भएका छन् । घाइतेहरुकोे बिर्तामोड, दमक, सुरुंगा र बिर्तामोडका अस्पतालहरुमा उपचार भइरहेको प्रहरीले जनाएको छ । तिब्र गतीमा भएको गाडीको स्टेरिङले काम नगरेपछि सडकबाट दक्षिण पल्टिएकोे प्रहरीले जनाएको छ । गाडी क्षतिग्रस्त अवस्थामा छ । गाडीको डिजेल पोखिएर आगलागी हुन नदिन दमकबाट गएको दमकलले आगलागी नियन्त्रणमा लिएको थियो ।
