इटहरी/ सुनसरीको मध्यहर्साहीमा शनिबार दिउँसो आगलागी हुँदा छ परिवारका १६ वटा घर जलेर नष्ट भएक छन् । मध्यहर्साही ४ का रामेश्वर मेहताको घरबाट सल्केको आगोले उनको घरसँगै रहेको सुरेन्द्र मेहता, भुनाइ मेहता तथा राजगन्ज सिनुवारी गाविस वडा नम्बर ४ का चन्दन यादव र भरतु यादवका गरि पाँच परिवारका १६ वटा घर जलेर नष्ट भएको इलाका प्रहरी कार्यालय हरिनगराका प्रहरी नायव निरीक्षक नगेन्द्र भगतले जानकारी दिए ।
आगलागिका कारण घरका साथै अन्नपात, लुगाफाटा लगायतका सरसामान जल्दा १० लाख रुपैयाँ बराबरको क्षति भएको प्रारम्भिक अनुमान छ । रामेश्वरको घरमा आयोजना गरिएको भोजका लागि खाना पकाउने क्रममा आगो लागेको प्रहरीले जनाएको छ ।
त्यसैगरी र्सलाहीको दक्षिण पश्चिममा पर्ने छटौल गाविसको सोना टोलमा शनिबार मध्यान्ह आगलागी हुँदा कम्तीमा २० घर जलेका छन् । घर भित्रका सबै सामान जलेकाले क्षति एक करोडभन्दा बढी हुने प्रहरीले जनाएको छ ।
उक्त आगलागीमा तीनवटा बाख्रा समेत जलेर मरेका छन् । स्थानीय दिलीप यादवको आँगनमा रहेको चुलोमा भएको आगो छिमेकीले थुपारेको परालमा लागेर गाउँभरी फैलिएको थियो । मध्यान्हदेखि निरन्तर हावा चलेका कारण बाक्लो बस्तीमा जताततै आगो फैलिएको प्रहरीले जनायो ।
आगो नियन्त्रण गर्न रौतहट र जनकपुरवाट दमकल मगाए पनि आइपुग्नु अघि नियन्त्रणमा आएकाले फर्काइएको प्रहरी उपरीक्षक रामप्रसाद श्रेष्ठले बताए ।
0 प्रतिकृया:
Post a Comment