झडपमा ४ प्रहरीसहित २१ घाइते
दमक/पहिले गरेका सहमति सरकारले कार्यान्वयन नगरेको भन्दै आन्दोलनरत शिक्षकहरुले अब विद्यालय बन्द नगरिकनै प्रदर्शनलाई निरन्तरता दिने भएका छन् । आइतबार र सोमबार विद्यालय बन्द गरेका उनीहरुले विद्यार्थी तथा अभिभावकको दबाबपछि विद्यालय बन्द नगर्ने बताएका हुन् ।
'अब विद्यालय बन्द गर्दैनौं, तर आन्दोलनलाई भने निरन्तरता दिन्छौं' नेपाल राष्ट्रिय शिक्षक संगठनका अध्यक्ष बाबुराम अधिकारीले भने -'दुर्इ दिन बन्द गर्नु पनि हाम्रो रहर होइन, सरकारकै रवैयाले बन्द गर्नुपरेको हो ।' दुर्इ दिन विद्यालय बन्द भएको क्षति बिदाको दिन पढाएर परिपूर्ति गर्ने शिक्षकहरुले बताएका छन् ।
यसअघि शिक्षकहरुले विद्यालयको पठनपाठनलाई प्रभावित नपार्ने गरी आन्दोलन गर्ने प्रतिबद्धता जनाएका थिए । नेपाल शिक्षक युनियन झापा अध्यक्ष नारायणप्रसाद गौतमले आजबाट विद्यालयहरुमा पठन-पाठन र आन्दोलन सँगसँगै लगिने बताएका छन् । विद्यालयहरुबाट ३० प्रतिशत शिक्षकहरुलाई आन्दोलनमा सहभागी हुन र बाँकीलाई पठन-पाठन गराउन निर्देशन दिइएको उनले जानकारी दिए । सोमबार दिन भर शिक्षकहरुले जिल्ला शिक्षा कार्यालयमा धर्ना दिएका थिए भने जिल्ला प्रशासन कार्यालय अघि कोणसभा गरेका थिए । यस्तै शिक्षकहरुले ट्रेड युनियन चोकमा समेत कोण सभा गरे । कोणसभाका वक्ताहरुले शिक्षकहरुका माग पूरा नभएसम्म आन्दोलन जारी रहने बताए ।
यस्तै सुनसरीमा आन्दोलनमा उत्रिएका शिक्षक र प्रहरी बीच झडप हुँदा ४ जना प्रहरी सहित २१ जना र्घाईते भएका छन् । शिक्षा कार्यालयको कम्पाउण्डमा शिक्षक युनियनका केन्द्रीय अध्यक्ष गोविन्द मिश्रको नेतृत्वमा आन्दोलनमा उत्रिएका शिक्षकहरुले कार्यालयको गेटमा तालाबन्दी गर्न खोजेपछि स्थिति असामान्य बनेको थियो । सो क्रममा झडप हुँदा प्रहरी जवान बाबुलाल खान, सुरेश कुमार माझी, डिल्ली भुजेल र राजकुमार वि.क सहित १७ जना शिक्षक घाइते भएका छन् ।
यस्तै केन्द्रीय अध्यक्ष गोविन्द मिश्र सहित शिक्षकहरु गोपालप्रसाद पराजुली, शम्भु यादव, विष्णुप्रसाद मेहता लगायतका शिक्षकहरु घाइते भएका हुन् । घाइते शिक्षकहरुमध्ये पराजुली, यादव र मेहताको न्युरो अस्पताल बिराटनगरमा उपचार गरिएको जिल्ला प्रहरी कार्यालय सुनसरीले जनाएको छ ।
0 प्रतिकृया:
Post a Comment