काठमाडौ । एसएलसी परिक्षामा असफल भएका कारण तीन दिनको अवधिमा चार जनाको ज्यान गएको छ । रुपन्देही, तनहुँ, मोरङ र धादिङमा तीनजनाले झुण्डिएर तथा बिष सेवन गरी आत्महत्या गरेका छन् ।
रुपन्देही बुटवल नगरपालिका–८ बस्ने १७ बर्षीया ममता पभरले शुक्रबार साँझ विष सेवन गरी आत्महत्या गरिन् । एसएलसी परिक्षाको नतिजा आउनासाथ सेवन गरेकी उनको किम्सन अस्पताल मणिग्राममा उपचारकै क्रममा मृत्यु भएको थियो । यसैगरी, तनहुँको भानु गाविस वडा नम्बर २, तिलहार बस्ने १७ बर्षीया मनिषा पाण्डेको पनि एसएलसीमा फेल भएकै कारण ज्यान गएको छ । एसएलसीं परिक्षामा असफल भएका कारण घरमा झुण्डिएर शनिबार उनले आत्महत्या गरेकी हुन् । यसैगरी धादिङ मैदी–८ देविस्थान
बस्ने १७ बर्षीय सुनिल भारतीले पनि शुक्रबार एसएलसींको नतिजा सार्वजनिक भएपछि आत्महत्या गरे । उनी देवीस्थानको केराबारी जंगलको रुखमा डोरीको पासो लगाई झुण्डिएर मृत्यु भएको अवस्थामा फेला परेका थिए । यता, फेल भएपछि निराश बनेकी मोरङ उर्लाबारीकी–७ की १७ वर्षीया लक्ष्मी खड्काले शुक्रबार साँझ घरमै झुन्डिएर आत्महत्या गरेकी थिइन् ।
0 प्रतिकृया:
Post a Comment