सर्वजातिय गोलमेच सम्मेलनको माग

दमक/संघिय गणतान्त्रिक पार्टीले सर्वजातिय गोलमेच सम्मेलन नभए सम्म राजनीतिक संकट समाधान नहुने बताएको छ ।
सोमबार झापाको दमकमा पत्रकार सम्मेलन गरि यसै साता गठन भएको पार्टीले गोलमेच सम्मेलन गरि सर्वजातिय सरकार गठनको पनि माग गरेको छ । आदिवासी जनजाती दलित गणतान्त्रिक मोर्चा, संघिय ताम्सालिङ् राज्य परिषद, तामाङ्सालिङ जनपरिषद र संघिय लोकतान्त्रिक राष्ट्रिय पार्टी एकिकरण भई संघिय गणतान्त्रिक पार्टी गठन भएको हो ।
पत्रकार सम्मेलनमा पार्टीका अध्यक्ष कमल छाराहाङले अहिलेको सरकार र संविधान सभाले राजनीतिक निकास दिन नसक्ने जिकिर पनि गरे । उनले संविधानसभा अन्तर्गतको वार्ता समितिले आफुहरुलाई वार्ताका लागि नबोलाएको र बोलाए पनि तत्काल वार्ता नगर्ने बताए ।
पहिचान बिहिनहरुलाई उपेक्षा गरि संविधान निर्माणको तयारी भई रहेकाले त्यसका बिरुद्ध पहिचान पक्षधरहरु बिच एकता भएको केन्द्रिय सचिव गजेन्द्र लाओतीले बताए । कार्यक्रममा उपाध्यक्ष पेशल तामाङ्, केवी लिम्बू, राजकुमार पालुङ्वा, संगठन बिभाग प्रमुख डिल्लि मिभक, केन्द्रिय सदस्य सन्तोस राई लगायतको उपस्थिती थियो ।

Posted in: समाचार