ताप्लेजुङ । पश्चिमी ताप्लेजुङका विभिन्न गाँउ विकास समितिमा वुधवार राती गएको पहिरोमा पुरिएर हराईरहेका २३ जनाको शव अझै भेटिएको छैन । यद्वपी सुरक्षाकर्मी र स्थानीयले उनीहरुको खोजी कार्य जारी राखेका छन् । जिल्ला प्रहरी कार्यालय ताप्लेजुङका अनुसार पहिरो प्रभावित मध्ये खोक्लिङ गाविसका २, थिङलावुका १, लिवाङका १५ र लिङतेपका ५ गरी २३ जना हराइरहेका छन् ।
स्थानीयले भने वेपत्ता सवैको मृत्यु भइसकेको दावी गर्दै आएका छन् ।
प्हिरो प्रभावित खोक्लिङ, लिङतेप, थिङलावु, लिवाङ, लिङतेप र सान्थाक्रा गाविसमा पहिरोमा पुरिएका ३८ जनाको शव भने यस अगावै निकालिएको थियो । ताप्लेजुङका प्रमूख जिल्ला अधिकारी डमरुप्रसाद निरौलाका अनुसार आइतवार पनि ताप्लेजुङका विभिन्न स्थानमा पानी परेकाले हराइरहेकाहरुको खोजीमा समस्या भएको थियो ।
यसैविच पहिरो प्रभावित सवै गाविसका वासिन्दालाई सोमवारदेखि राहत सामग्री वितरण गरिने भएको छ । प्रजिअ निरौलाका अनुसार पहिरो प्रभावित परिवारका सदस्यलाई नजिकैको प्रहरी चौकी मार्फत सामग्री वितरण गर्ने तयारी भएको हो ।
पीडित परिवारका लागि शनिवार नेपाली सेनाको हेलिकोप्टरले राहत सामग्री ओसारेको थियो । यस्तै स्थलमार्गवाट समेत ६ ट्याक्टर सामग्री प्रभावित गाविसमा पठाइएको स्थानीय प्रशासनले जनाएको छ ।
0 प्रतिकृया:
Post a Comment