दमक । सरकारले यसपटक बजेट विनियोजन नगर्दा अलपत्र परेको झापाको दमक वसपार्कको द्रुततर निर्माणको माग गर्दै ६ करोड बढीको योजना सरकारमा पेश गरिएको छ ।
निर्माण उपभोक्ता समितिले सहरी विकास मन्त्रालयमा ६ करोड १७ लाखको लागत स्टिमेट सहितको योजना पेश गरेको समिति अध्यक्ष तीर्थराज बस्नेत (शंकर) ले बताए । उनले बहुवर्षीय क्रमागत योजनामा परेको बसपार्कको निर्माण कार्यलाई निरन्तरता दिई बाँकी काम सम्पन्न गर्नका लागि योजनाको लागत पेश गरेको जनाए ।
हालसम्म दमक ११ मा रहेको सो वसपार्कको आधाजसो मात्र काम भएको छ । बाँकी रहेको वसपार्क कालोपत्रे सहितको ढलाई, जक्सन रोड, यात्रु प्रतिक्षालय र विद्युतीकरणका लागि सो रकमको योजना पेश गरिएकोसरकारको वहुवर्षीय अन्तर्गत क्रमागत योजनामा परेको भएपनि यस आर्थिक वर्षमा बजेट नआउँदा निर्माण कार्यमा समस्या भएको वस्नेतले समस्या दर्शाए । चालु आर्थिक वर्षमा अढाई करोडको हाराहारीमा बजेट आउनु पर्नेमा ४० लाख मात्र आएर काम अलपत्र बनेको उनको भनाई छ ।
यसअघि साढे ४ करोडको हाराहारीमा बसपार्क फिलिङ तथा फुटपाथ निर्माण, ढलनिकास र टर्मिनल भवनको काम भएको हो । ८६ जना अट्ने टर्मिनल भवन अत्याधुनिक र अपाङ्गमैत्री हुनेछ । नगरपालिकाले सामान्य हिसावले ग्राभेलको केही काम गरेको भएपनि आर्थिक वर्ष ०६८।०६९ बाट क्रमागत योजनामा परेर वसपार्क निर्माणको काम अगाढि बढेको थियो ।
नेपाली कांग्रेस दमक नगर सभापति ढुण्डीराज भण्डारी र एमालेका दमक नगर अध्यक्ष अम्बिका खनालले क्रमागत योजनामा परेका यसखाले विकास निर्माणका काममा सरकारले बजेट रोक्न नहुने धारणा राख्छन् । नगरपालिकाको कुल २ विगाहा १ कट्ठा क्षेत्रफलमा रहेको वसपार्क देशमै पहिलो अपाङ्गमैत्री वसपार्कका रुपमा निर्माण भएको नगरपालिकाको दावी छ ।
0 प्रतिकृया:
Post a Comment