अध्यक्षमा थापा र ओलीको चर्चा
बिर्तामोड/ग्याँस बिक्रेता महासंघ झापाको दोस्रो जिल्ला अधिवेशन आज बिर्तामोडमा हुँदैछ । जिल्लाका करिब ३ सय जना ग्याँस व्यवसायीहरुले भाग लिने अधिवेशनको उद्घाटन महासंघका पूर्व केन्द्रीय अध्यक्ष ज्ञानेश्वर अर्यालले गर्ने कार्यक्रम तय भएको छ ।
वर्तमान अध्यक्ष किशोर सिंहले सो अधिवेशन उद्घाटन गर्ने भनिएको भएपनि अस्वस्थताका कारण उनी आउन नसक्ने भएकाले पूर्व अध्यक्ष अर्याल कार्यक्रम उद्घाटनका लागि आइतबार नै बिर्तामोड आइपुगेका जनाइएको छ । उनीसँगै महासंघका केन्द्रीय उपाध्यक्ष चन्द्र थापा र महासचिव महेश्वरकुमार श्रेष्ठ पनि बिर्तामोड आइपुगेका छन् ।
अधिवेशनले महासंघको नयाँ नेतृत्व समेत चयन गर्नेछ । नयाँ नेतृत्व लिन मुख्य अध्यक्ष पदमा दमकका टेकबहादुर थापा र बिर्तामोडका लक्ष्मी ओलीको नाम चर्चामा रहेको स्रोतले जनाएको छ । त्यस्तै उपाध्यक्षमा लखनपुरका राजु न्यौपाने, सचिवमा दमकका महेन्द्र खड्कासहित घनश्याम मारवाडी र अन्य एकजना तथा कोषाध्यक्षमा चन्द्र थपलिया लगायतका व्यवसायीहरुको नाम चर्चामा रहेको समाचार स्रोतले जनाएको छ ।
0 प्रतिकृया:
Post a Comment