हम्सेदुम्से वनमा वृक्षारोपण

दमक । दमक नगरपालिकाले बुधबार भूकम्पमा परी ज्यान गुमाएकाहरुको सम्झनामा बृक्षारोपण गरेको छ । दमक ३को वेलडाँगी  स्थित हंसेदुम्से सामुदायिक बन उपभोक्ता समुहको हाता भित्र उनीहरुको सम्झनामा बृक्षारोपण गरेको हो ।
सशस्त्र प्रहरी वलका पूर्वाञ्चल प्रमुख डिआइजी निराकरम बिक्रम शाहले बिरुवा रोपेर बृक्षारोपणको उद्घाटन गरेका थिए ।  उपभोक्ता , बिद्यार्थी , संस्थाका प्रतिनिधि लगायतले बिरुवा रोपेका थिए ।  गत बैशाख १२ र २९ गते आएको भूकम्पमा परी ज्यान गुमाएकाहरुको ४५ औ दिनको स्मृतिमा टिक , चप्रासी , खाकर र सिरीसका बिरुवा रोपेको हुन् ।  ६ हेक्टर क्षेत्रफलमा एक साता भित्र  ९ हजार बिरुवा रोपिने नगरपालिकाले जनाएको छ । कार्यक्रमका प्रमुख अतिथि सशस्त्र प्रहरीका डिआइजी शाहले   बृक्षारोपण  गर्ने काम ठूलो  नभए पनि बिरुवाको संरक्षण गर्नु महत्वपूर्ण  काम भएको बताए ।
नगरपालिकाकाका कार्यकारी अधिकृत  युवराज दाहालले  दमकलाई हरित शहर बनाउन वातावरण संरक्षणमा ध्यान दिनुपर्ने बताए । नगरपालिका स्थानिय सरकार भएकोले रोपिएको बिरुवा हुर्काउने काममा  सरोकारवाला संस्था र उपभोक्ता सक्रियता हुनु पर्ने उनले उल्लेख गरे । नगरपालिकाका पूर्व मेयर रोमनाथ ओलीले बिरुवाको गोडमेल जस्ता काममा निरन्तरता दिनु पर्ने सुझाब दिए । कार्यक्रममा दमक बहुमुखी क्याम्पस सञ्चालक समितिका अध्यक्ष देवी दाहाल र हिमशिखर टेलिभिजन दमकका अध्यक्ष ध्रुव न्यौपाने लगायतले बोलेका थिए । बृक्षारोपणका बिषयमा समुहका अध्यक्ष हिमालय प्रसाद दाहालले जानकारी दिए ।

Read More

सुतार कार्की प्रतिष्ठानमा भौतिक संरचना निर्माण

दमक । दमक १६ स्थित सुतार कार्की प्रतिष्ठानमा  बिभिन्न भौतिक संरचना निर्माण गर्न थालिएको छ । यसअघि कार्यलय भवन निर्माण भइरहेको प्रतिष्ठानमा बुधबार शिब पाञ्चायन मन्दिरको शिलान्यास गरिएको छ । सुतार कार्की सेवा समितीका केन्द्रिय अध्यक्ष दिब्यध्वज कार्की, केन्द्रिय बरिष्ठ उपाध्यक्ष टेक बहादुर कार्की र पुर्बाञ्चल अध्यक्ष खेमकुमार कार्कीले संयुक्त रुपमा मन्दिरको शिलान्यास गरे । धार्मिक बिधी अनुसार तिनैजनाले पुजा गरि इटा राखेर मन्दिरको शिलान्यास गरेका थिए । स्थानीय सुतारकार्की बन्धुले निशुल्क दिएको डेढ बिगाहा जग्गामा प्रतिष्ठान निर्माण भइरहेको छ । गत बैशाख १८ देखि २४ गते लगाएको श्रीमद भागवत महापुराणबाट उठेको र प्रतिबद्धता गरिएको रकमबाट मन्दिर निर्माण गरिने छ । पुराणमा नगद ९ लाख र प्रतिबद्धता गरिएको सहित २७ लाख रकम संकलन हुने अनुमान छ । यसअघि प्रतिष्ठानमा ४ कोठे भवन समेत निर्माण भइसकेको छ ।  भवन निर्माण अन्तिम चरणमा पुगिसकेको छ ।  त्यसैगरि प्रतिष्ठान वरिपरि ताराबेरा गरि बृक्षारोपण समेत गरिएको छ । 
बुधबार भएको शिब पाञ्चायन मन्दिरको उद्घाटन कार्यक्रममा समितिका केन्द्रिय अध्यक्ष दिब्यध्वज कार्कीले देशभरका सुतार कार्कीहरुको कुल घर नै प्रतिष्ठानलाई बनाउने बताए । उनले दमकबाटै सुतार कार्कीहरुको एकैदिन देवाली गर्न अभियान शुरु गर्ने जानकारी दिदै त्यसका लागि प्रतिष्ठान उपर्युक्त स्थान भएको उल्लेख गरे । सुतार कार्कीहरुको बंशावली संकलन गर्ने काम जारी भइरहेको जानकारी दिदै उनले समितीको केन्द्रिय साधारण सभा पनि दमकमै गर्नसक्ने जनाए । कार्यक्रममा समितिका केन्द्रिय बरिष्ट उपाध्यक्ष टेक बहादुर कार्की, केन्द्रिय उपाध्यक्ष दिलेन्द्र कार्की, पुर्बाञ्चल अध्यक्ष खेम कुमार कार्की, महासचिब गोबिन्द कार्की, झापा अध्यक्ष पदमसिंह कार्की, मोरङ अध्यक्ष चन्द्र कार्की, सिन्धुली अध्यक्ष नरेन्द्र कार्की, सर्लाही अध्यक्ष मानध्वोज कार्की, शशस्त्र प्रहरी बल पाथीभरा गण मेचीका गणपति भरतबाबु कार्की, जग्गादाता फौदसिंह कार्की लगायत धनेन्द्र कार्की, मिना कार्कीले बोलेका थिए ।

Read More

गाउँलेमाथि हात्ती आक्रमण, २ महिलासहित ३ को मृत्यु

दमक । एउटा जंगली हात्तीको आक्रमणबाट दक्षिणी इलामको चुलाचुलीमा बुधबार विहान दुईजना महिलाको ज्यान गएको छ । बिहान चुलाचुली ६ पेल्टीमारीकी ४२ वर्षीया प्रीति लिम्बु र चुलाचुली ४ तिनकुनेकी ३२ वर्षीया अशक्त महिला धनमाया लावतीको हात्तीको आक्रमणमा ज्यान गएको प्रहरी चौकी चुलाचुलीले जनाएको छ । विहान ५ बजेको समयमा घर बाहिर निस्किएकी धनमायालाई हात्तीले आक्रमण गरेको थियो । दाजुको घरमा वास बसेकी धनमाया उठेर आफ्नो घर फर्कदै गर्दा हात्तीको आक्रमणमा परेकी थिइन् ।
 त्यसपछि सो हात्तीले केही पश्चिममा पुगेर घर पछाडी काम गर्दै गरेको अवस्थामा प्रीतिलाई आक्रमण गरेको चुलाचुली प्रहरी चौकी प्रमुख दिवाकर कटुवालले जनाए । हात्तीले आक्रमण गरी २५ मिटर टाढा घिसारेर सख्त घाइते प्रितीको उपचारका लागि लैजान तयारी गर्र्दा गर्दै घरमै ज्यान गएको थियो । सो हात्तीले बाटोमा हिँड्ने अरुलाई पनि आक्रमण प्रयास गरेको र स्थानीय भागेर ज्यान जोगाएका थिए । हात्तीले गाउँमा आतंक फैलाएपछि चुलाचुलीमा रहेको नेपाली सेनाको २२ नम्बर वाहिनीको टोलीले हात्तीलाई लखेटेर कमलखोला पारी उत्तरतर्फ जंगलतिर धपाएको थियो । हात्तीको आक्रमणमा दुई जना महिलाको ज्यान गएपछि आतंकित भएका चुलाचुलीबासीलाई सुरक्षा दिन बुधबार राती प्रहरी, इलाका बन र स्थानियबासिन्दाले संयूक्त गस्ती गर्ने भएका छन् । हातीले आएर आतंक मच्चाएमा हवाइ फायर समेत गर्ने अनुमती जिल्ला प्रहरी कार्यलय इलामले दिएकोले गाउलेहरुलाई ढुक्कले बस्न प्रहरीले आग्रह गरेको छ । 
त्यस्तै करेन्ट लागेर मोरङको पथरी शनिश्चरे नगरपालिकामा बुधबार दिउँसो एक बृद्धाको घटनास्थलमै मृत्यु भएको छ । दिउँसो साढे १२ बजे आँप टिप्ने क्रममा बिजुलीको चुडिएको तारबाट करेन्ट लाग्दा पथरी शनिश्चरे ७ कि ७० वर्षिया बृद्धा लिलामाया पाख्रिनको मृत्यु भएको हो । बृद्धाको शवलाई पोष्टमार्टमका लागि प्राथमिक स्वास्थ्य केन्द्र उर्लाबारी मंगलबारेमा राखिएको छ ।

विभिन्न घटनामा ७ घाइते

पथरी । मोरङको पथरी शनिश्चरेमा बुधबार दिउँसो दुई वटा मोटरसाईकल एक आपसमा ठक्कर खाँदा चार जना गम्भिर घाईते भएका छन् । दिउँसो २ ः ४० बजेतिर  पथरी शनिश्चरे ६ स्थित भित्रि सडक खण्डमा मे ४ प ८६७७ र मे ४ प ३६२५ नम्बरको मोटरसाईकल एक आपसमा ठक्कर खान पुग्दा दुर्घटना भएको थियो । दुर्घटनामा परी ८६७७ नम्बरको मोटरसाईकलका चालक हसन्दह ४ का ४५ वर्षिय इश्वर थापा र पछाडी सबार सोही ठाउँकी १७ वर्षिया लक्ष्मी थापा तथा ३६२५ नम्बरको मोटरसाईकल चालक जाँते ४ का २३ वर्षिय मिलन तामाङ र सोही ठाउँकी १९ वर्षिया दुर्गा श्रेष्ठ गम्भिर घाईते भएका हुन् । घाईतेहरुको बिराटनगरको न्युरो र नोबेल हस्पिटलमा उपचार भईरहेको इलाका प्रहरी कार्यालय पथरीले जनाएको छ ।
यसैबीच विद्युत वायरिङमा त्रुटि भएका कारण झापाको दमक १५ मा करेन्ट लागेर एउटा गाई मरेको छ । स्थानीय डिल्लीप्रसाद ओलीको ४५ हजारमा किनेको गाई बुधबार विहान विद्युत वायरिङमा त्रुटि भएका कारण करेन्ट घरभरी सर्टेज भएको थियो । सो क्रममा आँगनमा रहेको गाईलाई पनि करेन्ट लागेर मरेको ओलीका नातेदार युवराज पौडेलले बताए ।
त्यस्तै बुधबार विहान पानीसंगै परेको चट्याङले लागेर मोरङमा तीन जना घाइते भएका छन् । जिल्ला प्रहरी कार्यलय मोरङका अनुसार मोरङ बुधनगर ८ का अमित शर्मा, सोही ठाउ“की मिरा सरबरिया र उमानन्द शर्मा घाइते भएका छन् । उनीहरुको विराटनगर तथा भारतको  अस्पतालमा उपचार भइरहेको छ ।

Read More

राप्रपा नेपालका नेता लावतीको निधन

पद्मसुन्दर लावती

दमक । पूर्व मन्त्री तथा राप्रपा नेपालका राप्रपा नेपालको सह अध्यक्ष पद्मसुन्दर लावतीको ७६ वर्षको उमेरमा बुधबार विहान निधन भएको छ ।

मृगौला सम्बन्धी समस्याका कारण काठमाडौंको नर्भिक अस्पतालमा उपचारका क्रममा लावतीको निधन भएको उनकी  बुहारी एवम् सभासद् बबिना लावती मोक्तानले जानकारी दिइन् । उनी गत जेठ २३ मा नर्भिक अस्पतालमा भर्ना गरिएका थिए । उनको स्वास्थ जटिल वन्दै गएपछि वुधवार विहानैबाट परिवारको अनुरोधमा उनलाई भेन्टिलेटरमा राखिएको थियो । लावती मृगौलाका साथै रक्त अल्पता र श्वासप्रश्वास लगायतका समस्यावाट पनि ग्रसित थिए ।

पञ्चायतदेखि प्रजातन्त्र पुनस्र्थापना पश्चात समेत पटक पटक गृह, प्रशासन र कृषिसहित विभिन्न मन्त्रालय सम्हालेका लावतीको जन्म ७ साउन १९९६ सालमा भएको थियोे ।

२०१४ सालमा विद्यार्थी अवस्थावाटै राजनीतिमा सक्रिय लावती २०१९ सालमा युवक संगठन अञ्चल सभापति, २०२१ सालमा यासोक गाँउ पञ्चायतको प्रधानपञ्च, २०२४ सालमा जिल्ला पञ्चायतको सदस्य, २०२९ सालमा उद्योग वाणिज्य राज्यमन्त्री हुँदै, स्वास्थ, खाद्य र गृह मन्त्रीका समेत भएका थिए । गृहजिल्ला पाँचथरको विकासमा योगदान दिएका लावतीकै पहलमा मेची अञ्चलका जिल्लाहरु जोड्ने मेची राजमार्ग निर्माण, पाँचथर सदरमुकाम फिदिमदेखि यासोकसम्म विद्युतीकरण लगायतका काम भएको थियो ।

उनी स्वास्थ मन्त्री हुँदा झापाको भद्रपुरमा २५ वेडको अस्पताल स्थापनासँगै अस्पतालका लागि ५ विगाहा जमिन खरिद, पाँचथर सदरमुकाम फिदिममा १५ वेडको अस्पताल स्थापना र ५० रोपनी जग्गा खरिद, तेह«थुममा १५ वेडको अस्पताल स्थापना, ताप्लेजुङ, गुल्मी, भैरहवा, अर्घाखाँची, मनाङ, मुस्ताङ र चैनपुरमा अस्पताल स्थापनासँगै वीर अस्पतालको समेत स्तरवृद्धी गरिएको उनको जीवनीमा आधारित ‘मेरो देश मेरो परिवेश’ नामक पुस्तकमा उल्लेख छ ।

राजा ज्ञानेन्द्रको प्रत्यक्ष शासनलाई सघाएका पूर्वपञ्च लावतीको प्रधानमन्त्री बन्ने चाहनालाई भने तत्कालीन दरबारले पुरा गरेन । त्यसमा असन्तुष्ट लावती बेलाबेलामा ‘राजाले मलाई पत्याएनन्’ भन्दै गुनासो गर्थे । २०४६ सालको परिवर्तनसँगै राष्ट्रिय प्रजातन्त्र पार्टीमा रहेका लावती पछिल्लो पटक राप्रपा नेपालको सह अध्यक्ष भएका थिए । तर, केही समयअघि मात्रै कमल थापासँग केन्द्रीय अध्यक्षमा पराजित भएपछि लावतीले पार्टी विभाजन गर्दै आफ्नै संयोजकत्वमा राप्रपा नेपाल सुदृढीकरण अभियान शुरु गरेका थिए । लावतीका एक श्रीमती, दुई छोरी र तीन छोरा छन् ।

Read More

मोरङका सिद्धान्त विश्वकप क्रिकेटमा

सिद्धान्त लोहनी

मोरङ । मोरङ विराटनगरका सिद्धान्त लोहनीले आइसीसी विश्वकप क्रिकेट छनौट खेलमा नेपाली टोलीबाट खेल्ने पक्का भएको छ ।
बुधबार पारस खड्काको कप्तानीमा घोषणा गरिएको १५ सदस्यीय नेपाली टोलीमा बिराटनगरका लोहनी पनि पर्न सफल भएका हुन् । सो टोलीमा लोहनी नयाँ अनुहारका रुपमा टिममा अटाएका छन् । लोहनीले राष्ट्रिय क्रिकेट प्रतियोगितामा उत्कृष्ट ब्याटिङ गरेका थिए ।
अनिल मण्डल, जितेन्द्र मुखिया र प्रदिप ऐरी पनि टोेलीमा परेका छन् । टोलीका अन्य सदस्यहरुमा शरद भेषवाकर, बसन्त रेग्मी, सोमपाल कामी, करण केसी, सुवास खकुुरेल, ज्ञानेन्द्र मल्ल, शक्ति गौचन, सागर पुन, विनोद भण्डारी र राजेश पुलामी मगर छन् । पृथु
बास्कोटा, मेहबुब आलम, भुवन कार्की र अभिनाश कर्ण भने बैकल्पिक खेलाडीमा परेका छन् । आउँदो जुलाई ३ देखि २६ सम्म आयरल्याण्ड र स्कटल्याण्डमा हुने प्रतियोगिताका लागि खेलाडी छनौट गरिएको क्रिकेट संघ    (क्यान) का कार्यबाहक अध्यक्ष दीपक कोइरालाले बुधबार विज्ञप्ति निकालेर जानकारी दिएका छन् । नेपाली टोली अहिले भारतको धर्मशालमा बन्द प्रशिक्षणमा रहेको छ ।

Read More

लेटाङमा निशुल्क स्वास्थ्य शिविर सम्पन्न

पथरी । मोरङको लेटाङ भोगटेनी नगरपालिकामा बुधबार नि:शुल्क स्वास्थ्य शिविर सम्पन्न भएको छ । उर्लाबारीको मदन भण्डारी स्मृति प्रतिष्ठान अन्र्तगत सामान्य चिकित्सा तेश्रो वर्षमा अध्ययनरत बिद्यार्थीहरुको आयोजनामा शिविर सम्पन्न भएको हो । शिविरमा सो क्षेत्रका एक सय बढीले स्वास्थ्य परीक्षण गराएका थिए । शिविरमा रक्तचाप, मधुमेह र मृगौला रोगको परिक्षण गरिएको थियो । शिविर लेटाङ भोगटेनी प्राथमिक स्वास्थ्य केन्द्रको प्राबिधिक सहयोग सम्पन्न भएको थियो । सोही बिद्यार्थीहरुको टोलीले आउँदो शनिबार उर्लाबारी बहुमुखी क्याम्पसमा दन्त शिविरको समेत आयोजना गर्ने कार्यक्रम संयोजक अग्नि भट्टराईले जनाए ।

Read More

कांग्रेस मोरङमा उम्मेद्वारीहरुको दौडधुप

उर्लाबारी । नेपाली कांग्रेसको १३ औं महाधिवेशन नजिकिदै गर्दा मोरङमा पनि नेतृत्वको चयनका लागि उम्मेदवारी घोषणाको क्रम चलेको छ । संस्थापन र देउवा पक्षले नेतृत्व हत्याउन छुट्टा–छुट्टै उम्मेदवारी घोषणा गरेका छन् ।
संस्थापन पक्षबाट मोरङ कांग्रेसका पूर्व सचिवहरू गोपालमान सिंह राजभण्डारी, ,सञ्जय भट्टराई र मदन संग्रौलाले सभापतिको उम्मेद्वारी घोषणा गरेका छन् भने त्रिलोचन रिजालले पनि संस्थापन पक्षबाटै सभापतिको आकांक्षी बन्ने पक्कापक्की भएको छ । उता संस्थापन पक्ष भन्दा कमजोर संगठन भएको मोरङ कांग्रेसमा देउवा पक्षले पनि सर्वसम्मत उम्मेदवार चयन गर्न नसक्ने अवस्था देखिएको छ । अघिल्लो अधिवेशनमा संस्थापन पक्षबाट सभापति जितेका अमृत अर्याल यो पटक क्याम्प परिवर्तन गरी पुनः सभापति बन्ने दौडमा देखिएका छन् । अर्यालसँग चुनाव हारेपनि अर्याललाई देउवा कित्तामा ल्याउन महत्वपूर्ण भूमिका निर्वाह गरेका डिगबहादुर लिम्बू आफू सर्वसम्मत उम्मेदवार बन्न पाउनु पर्ने दावी गरिरहेका छन् । तर देउवा पक्षमा  अर्याल र लिम्बूसँगै दिलिपकुमार गच्छदार पनि आफूलाई सर्वसम्मत उम्मेदवार बनाउन केन्द्रीय नेतृत्वसँग लविङ गरिरहेको बुझिएको छ ।
संस्थापन पक्षका उम्मेदवारहरूमध्ये गोपालमानसिंह राजभण्डारी सबैभन्दा पुराना र कोइराला परिवारका आज्ञाकारी उम्मेदवार मानिन्छन् । उनलाई नजिकबाट चिन्ने कांग्रेसजनका अनुसार  तत्कालिन कोइराला निवासका विश्वासपात्र मानिएका राजभण्डारीसँग स्वर्गीय नोना कोइराला र गिरिजाप्रसाद कोइरालाको किचन क्याविनेटमा रहेर काम गरेको अनुभव छ । यद्यपि पछिल्लो दशक कांग्रेस राजनीतिमा उनको चर्चा कम हुने गरेको छ । नोना र गिरिजाप्रसाद कोइरालाको निधन पछि छायाँमा परेका राजभण्डारीलाई हाल आएर नोना पुत्र डाक्टर शेखर कोइरालाको भरपर्दाे आशिर्वाद रहेको छ । कोइराला परिवारसँग निकट रहेर लामो समय राजनीति गरेका राजभण्डारी मोरङ कांग्रेसको सभापति बन्न योग्य ब्यक्ति भएपनि उनलाई संस्थापन पक्षकै केन्द्रीय नेताहरू महेश आचार्य, सुजाता कोइराला र मीनेन्द्र रिजालले असहयोग गर्ने बताइन्छ । गिरिजाप्रसाद कोइरालासँग अन्तरंग सम्बन्ध कायम गर्न सफल राजभण्डारीले प्रतिबन्धित कालमा गरेको काम र सुजाता कोइराला सक्रिय राजनीतिमा आउँदै गर्दा राजभण्डारीको राजनीति आझेलमा पर्दै गएकोले स्वंय सुजाताले राजभण्डारीलाई सहयोग गर्नेमा शंका उठ्न थालेको छ । एकातिर कोइराला परिवार भित्रको आन्तरिक राजनीतिमा पनि शेखर र सुजाताबीच सामन्जस्यता नभएकोले बरु महेश आचार्य र  आमोदप्रसाद उपाध्यायको समर्थन राजभण्डारीलाई हुने बताइएको छ । तर उपाध्याय हाल क्यान्सरको उपचार गराइरहेकाले अबको अधिवेशनमा उनको भूमिका लगभग शुन्य हुने निश्चित छ । सभापतिको दावी गरिरहेका मदन संग्रौलालाई कांग्रेस महामन्त्री कृष्ण सिटौला र केन्द्रीय सदस्य मीनेन्द्र रिजालको भरथेक रहेको छ । संग्रौला युवाहरूबीच लोकप्रिय मानिन्छन् । तर मोरङ कांग्रेसलाई हाक्न सक्ने क्षमता संग्रौलाले बटुलि नसकेको बताइन्छ । विगतमा प्रजातान्त्रिक कांग्रेसको मोरङ नेतृत्वमा रहेर विभिन्न भूमिका निर्वाह गरिसकेका संग्रौला पछिल्लो समय मीनेन्द्र रिजालसँगै संस्थापन पक्षमा लागेका छन् ।

Read More

मोतियाविन्दुका ४६ विरामी

दमक । पाथिभरा नेत्रालय दमक र मेची अाँखा अस्पताल बिर्तामोडले आयोजना गरेको ७ दिने निशुल्क आँखा शिविरमा  ४६ जना मोतीया विन्दुको रोगी फेला परेका छन् । दमक १ स्थित नेत्रालयमा भएको शिविरमा  मोतीया विन्दुका रोगी मध्ये २४ जनाको आँखा अस्पतालमा लगेर शल्यक्रिया गरेको छ ।  नेत्रालयका सञ्चालक समिति संयोजक तथा लान्यस क्लव अफ माउण्ट एभरेष्ट दमकका अध्यक्ष अजय अग्रवालले जानकारी दिएका छन् । बांकी २२ जनाको  मोतीया बिन्दु रोगीहरुले एक साता भित्र शल्यक्रिया गर्ने अस्पतालले जनाएको छ ।
बुधवार सम्पन्न ७ दिने शिविरमा  जम्मा ६ सय ३ जना आँखाका रोगीले आँखा परीक्षण गराएका थिए । शिविरमा आँखा पाक्ने , मोतीयाविन्दु, जलबिन्दु , आँखामा मासु पलाउने, दुरदृष्टि, अदुरदृष्टि, आँखाको संक्रमण लगायतका लक्षण देखिएको अप्थल्मिक एसीस्टेन्ट बिष्णु महतराले बताए । झापा, मोरङ र इलाम लगायतका ठाउँबाट आँखाका रोगीहरु सेवा लिन आउने गरेको नेत्रालयले जनाएको छ ।

Read More