सहकारीको लेखापाल तालिम

दमक/ सहकारी संस्थामा आवद्ध लेखापालहरुको क्षमता अभिबृद्धि गर्ने उद्देश्यले दमकमा पाँच दिने तालिम सञ्चालन गरिएको छ ।
शुक्रबारदेखि शुरु भएको सो तालिममा दमक, तोपगाछी, धरमपुर र लखनपुर गाविस अन्तर्गत ३० ओटा सहकारीका लेखापालहरुको सहभागिता रहेको छ । तालिम उद्घाटन कार्यक्रममा राष्ट्रिय सहकारी संघका सदस्य गणेश बस्नेत, डिभिजन सहकारी कार्यालयका प्रमुख नेत्र प्रसाद घिमिरे लगायतले सहकारीका बारेमा बोलेका थिए ।
अन्तर्राष्ट्रिय सहकारी वर्ष २०६८ को सन्दर्भ पारेर झापा जिल्ला सहकारी संघ क्षेत्रीय समन्वय समिति र डिभिजन सहकारी कार्यालयले संयुक्त रुपमा सोतालिमको आयोजना गरेका हुन् । तालिमको उद्घाटन संघका क्षेत्रीय संयोजक प्रेमकुमार कोइरालाको अध्यक्षतामा भएको थियो भने डिभिजन प्रमुख घिमिरे, संघका क्षेत्रीय सदस्य लिलाकान्त भट्टराई लगायतका सहकारी अगुवाहरु सहजकर्ता छन् । डिभिजनले जिल्ला भरीका सहकारीका लेखापालहरुलाई व्यवस्थित लेखा सञ्चालन गर्ने सम्बन्धमा त्यस्ता तालिम सञ्चालन गरिआएका छन् ।

Posted in: समाचार