पाँचथर । राष्ट्रिय गौरवको आयोजना निर्माणका क्रममा गिटीढुंगा उत्खननको कार्य रोक्न जिल्ला अदालत पाँचथरमा परेको मुद्दा खारेज भएपछि मध्यपहाडी लोकमार्गअन्तर्गत जोरसाल–तमोर खण्डको काम सुरु भएको छ । फिदिम–५ स्थित चिउरीगौंडामा रहेको गिटीढुंगा उत्खननको कार्यले वातावरण र बस्तीमा खतरा पुगेको भन्दै तत्काल रोक्न माग गरेर जिल्ला अदालतमा मुद्धा दायर भएपछि काम रोकिएको थियो । चार महिनाअघिबाट जारी मुद्दाको किनारा लगाउँदै जिल्ला अदालत पाँचथरले तत्काल उत्खनन कार्य रोक्ने कुनै आधार नदेखिएको फैसला गरेपछि काम सुरु भएको हो । गिटी ढुंगा उत्खननस्थलमा पर्ने डाँडा सामुदायिक वनका उपभोक्ताले उत्खनन कार्य तत्काल रोक्न माग गर्दै सो मुद्दा दायर गरेका थिए । उनीहरूले वन विनाश भएको, पहिरोको खतरा बढेको, त्यसभन्दा माथिको बस्ती जोखिममा परेकोलगायत कारण देखाएर २८ माघमा मुद्दा दायर गरेका हुन् । विनाकारण लामो समयसम्म काम बन्द गर्नुपर्दा करोडौंको क्षति भएको निर्माणको जिम्मा पाएको याक्थुम्हाङ निर्माण सेवा प्रालिका अध्यक्ष तेजकुमार कुरुम्वाङले बताए ।
0 प्रतिकृया:
Post a Comment